Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
6 февраль куни Москванинг «Каро 11 Октябрь» кинотеатрида Эрон тарихида энг қиммат деб тан олинган «Муҳаммад – Аллоҳнинг Расули» фильмининг тақдимоти бўлади. Тақдимотга фильм режиссёри Мажид Мажидийнинг ҳам ташриф буюриши кутилмоқда.
Таниқли режиссёр Мажид Мажидийнинг «Муҳаммад – Аллоҳнинг Расули» номли фильми Эрон кинематографияси тарихида энг қиммат лойиҳа ҳисобланади. Илк бор Эронда 2015 йилнинг 27 августида намойиш этилиб, бир ондаёқ томошабинларнинг олқишларига сазовор бўлган бу фильм, Пайғамбаримиз соллаллоҳу алайҳи васалламнинг болалик йиллари ҳақида сўзлайди. Фильм «Пайғамбар Муҳаммаднинг ҳаёти» трилогиясининг биринчи қисми ҳисобланади.
Суратга олиш ишлари ўн йил давом этиб, 50 млн. долларга яқин маблағ сарф қилинган. Лойиҳага Эроннинг энг машҳур актёрлари – Маҳди Пакдел, Алиреза Шожа Нури, Мохсен Танабандехлар жалб қилинган. Шунингдек, иш жараёнида бошқа мамлакатлардан мутахассислар ҳам қатнашганлар. Ижодида учта фильми «Оскар» мукофотига сазовор бўлган монтажчи-оператор Витторио Стораро, монтажчи Роберто Перпиняни, махсус эффектлар саҳналаштирувчиси Скотт Андерсон ва ўнга яқин кино оламидаги мутахассислар иш олиб борган. Фильм тақдимоти бир қанча бошқа мамлакатларда ҳам бўлиб ўтиб, катта шуҳрат қозонган.
Суратнинг юқори сифатлилиги бугунги кун Эрон киносанъатининг ташриф қоғозига айланди десак, муболаға бўлмайди. Иш жараёни давомида қўлланган янгича технологиялар Эрон кинематогрофиясининг жаҳон киносаноатида муносиб ўрин эгаллай олишига яққол далилдир.
манба: «musulmanka.ru»
