Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Модомики, банда Аллоҳ унга кўрсатган йўлдан оғишмай бораркан ҳамиша ютуқдадир. Йўлда учраган тўсиқлар, оёғига ботган тиканларнинг ҳам уни покловчи бир раҳмат эканига иймон келтирганида банда Яратганга янада кўпроқ яқинлашади.

Дунёда одам учун жондан ширинроқ, жондан азизроқ нарса йўқ. Энг азиз деб билган, ҳамиша асраб авайлаб юрган бойлигини ҳам унутиб, Аллоҳга бўлган муҳаббати сабаб ўзини бахтиёр ҳис қилган кишидан ҳам Яратганга яқинроқ ким бор?!...

Оғриқларини кўксига босиб, юзларида табассум, кўзларида ёш билан турган, қалби шукроналик неъмати ила тўлиб тошган банданинг ҳолидан ҳам гўзалроқ ҳол борми дунёда?!...

Бу дунёга яшаш учун келмайдилар. Бу дунёни ўзиники қилиш учун келмайдилар. Бу дунёни эгаллаб олиш учун келмайдилар. Ақл эгалари бу дунёдан бир табассум билан ўтиб кетадилар. Шу биргина табассум ичида уларнинг маъсуд ғалабалари пинҳондир. Бу дунёга алданмаганлар нақадар бахтиёрлар. Бу дунёдан қалбини ҳоли қилганларга Аллоҳнинг раҳмати бўлсин!

Дилбар Ражапова